«Берничә елдан соң ачылган сер». 17 яшьлек кыз 23 мең сумга яңа туган бала алып үстергән

2017 елда Иркутскида яшәүче хатын бала таба, ләкин бу – аның өчен шатлыклы вакыйга булмый. Элек хөкем ителгән хатынның даими торагы да, тотрыклы кереме дә юк. Ул үз баласын үстерергә җыенмый һәм «чыгу юлын» таба... баланы сатарга! Бу хакта «Комсомольская правда» яза.

Ул социаль челтәрдә балаларны эзләү һәм уллыкка алу буенча махсус бергәлектә «Тәрбиягә бала бирәм. Түләүсез» дигән белдерү калдыра.

Җавап озак көттерми. Аңа 17 яшьлек кыз яза. Әле үзе дә балигъ булмаган кыз баланы тәрбиягә алырга теләвен әйтә.

Алар очрашалар. Иркутск-Пассажирский вокзалы бинасыннан ерак түгел урында хатын үз баласын чит кешегә тапшыра. Моның өчен аңардан 23 мең сум акча ала.

– Соңыннан бу кыз аны уллыкка ала, малай бу еллар дәвамында һәм хәзергә кадәр гаиләдә тәрбияләнә, – дип хәбәр итәләр Иркутск өлкәсенең гомуми юрисдикция судларының берләштерелгән матбугат хезмәтендә.

Бу хәл күп сораулар тудыра. Урам уртасында таныш булмаган хатыннан алынган чит кешенең баласын ничек шулай җиңел генә уллыкка алырга мөмкин булган? 17 яшьлек кызга бу бала кайдан килгән? Сабыйның атасы кайда?

Берничә елдан соң сер ачыла. 2024 елда баланың биологик әнисен табалар.

«Кешеләр белән сәүдә итү» маддәсе буенча җинаять эше кузгатыла. Свердловск район суды хатынны гаепле дип таба һәм 6 елга гомуми режимлы төзәтү колониясенә хөкем итә, диелә хәбәрдә.