Байкал аръягындагы авылда шәхси йортта янгында ике бала һәлак булган. «Аларны беркем коткармаган», – дип хәбәр итә «Комсомольская правда».
7 декабрьдә Митрофаново авылында көндез 4 яшьлек малай һәм 1,5 яшьлек кыз бала тереләй янып үлгән, диелә бу хәбәрдә.
«Анда балалар бар», – дип кычкырыша күршеләре, янгын сүндерүчеләр килеп җиткәч. Агач йорт тәрәзәләреннән куе төтен ургылып чыга. Коткаручылар өй эченә кереп китә, тик алар сабыйларның мәетләрен генә алып чыга.
«Янгын вакытында 4 яшьлек малай, 1,5 яшьлек кыз бала һәлак булды. Якынча белешмә буенча, балаларны караучысыз калдырып киткәннәр», – дигәннәр өлкә буенча Тикшерү идарәсендә.
Янгынны сүндергәннәр. Өйдә 15 квадрат метр мәйданда әйберләр янган.
Фаҗига вакытында өлкәннәрнең кайда булуы хәбәр ителми. Янгын сәбәбе дә әлегә ачыкланмаган. Урында тикшерүчеләр эшли, экспертизалар билгеләнгән. «Саксызлык аркасында ике кешене үтерү» маддәсе буенча җинаять эше ачылган.
Коткаручылар балаларны караучысыз калдырырга ярамавын искәртә.