Бер йокысыз төн куркыныч авыру китереп чыгарырга мөмкин?
Хәтта бер төн йокысызлык киләчәктә диабет барлыкка килүенә сәбәпче була ала, дип исбатлаган Япония галимнәре.
Бер йокысыз төн аркасында организмда глюкоза эшләп чыгару һәм инсулинны эшкәртү функциясе үзгәрергә мөмкин. Моның нәтиҗәсендә бавыр стеатозы һәм 2нче типтагы шикәр диабеты барлыкка килергә мөмкин. Бу фактларны Тохо университеты галимнәре раслаган, дип яза РИА Новости.
Йокылары туймаган кешеләрнең күп ашавы, аз хәрәкәтләнүе һәм диабетның 2нче төреннән ешрак интегүләре мәгълүм. Галимнәр организмның глюкозаны эшкәртү сәләте ашауга гына түгел, йокысызлыкка да бәйле түгел микән, дигән сорауга җавап эзләгәннәр. Алар тычканнардан ике төркем булдырып, бер төркемне төн саен алты сәгать дәвамында йоклатмыйча тоткан, ә икенче төркемгә йокларга мөмкинлек биргән. Ике төркемдә дә тычканнарга майлы ризык һәм баллы су бирелгән.
Беренче төн үтүгә үк, йокламаган тычканнарның канында глюкоза һәм майлы триглицеридлар микъдарының, йокылары туйган тычканнарныкы белән чагыштырганда, күбрәк булуы ачыкланган.
Триглецеридларның күп булуын инсулинга резистентлык белән бәйлиләр, бу турыдан-туры диабетның икенче төрен китереп чыгарырга сәбәп була ала, ди галимнәр.