Мәскәүдә лалә чәчәкләре партиясен урларга маташкан ир-атны тоткарлаганнар. Бу турыда «Вести» каналы хәбәр итте.
Ул 8 Март алдыннан баемакчы булган. Россия Эчке эшләр министрлыгының рәсми вәкиле Ирина Волк сүзләренчә, ир-ат Архангельск эшмәкәре игъланын күреп ала. Эшмәкәр хатын-кыз лалә чәчәкләрен Мәскәүдән кайтару өчен экспедитор эзли. Җинаятьче ир-ат аңа үз хезмәтләрен тәкъдим итә. Ул чәчәкләрне алып кайту өчен машина йөртүче таба. Ләкин алар башка маршрут белән китә. Лалә чәчәкләре партиясе бәясе 2 миллион сумнан артыграк.
Алданган хатын-кыз полициягә мөрәҗәгать итә. Җинаятьчене тоткарлыйлар. Ул Мәскәү өлкәсендә яшәүче ир-ат булып чыга.
Чәчәкләрне хуҗасына кайтаралар.
Җинаять эше ачылган, диелә хәбәрдә.
