Бакчада кырмыскалардан котылу өчен бер мәртәбә эшкәртү генә ярдәм итми, моны системалы эшләп барырга кирәк. Бу хакта эксперт Александр Чикинга сылтама белән «Аргументы и факты» газетасы яза.
Белгеч аңлатканча, беренче эш итеп бөҗәкләрнең барлыкка килү сәбәпләрен юкка чыгарырга кирәк. Өйдә бөтен бүлмәләрне яхшылап җыештырырга, азык-төлекне герметик контейнерларда сакларга, чүпне вакытында түгәргә һәм өслекләрдә ризык калдыклары калдырмаска кирәк. Бакчада исә, туфрак торышын күзәтергә, органик калдыклар тупламаска һәм дымлылыкны контрольдә тотарга кирәк.
Кырмыскалар белән көрәшү өчен белгеч акрын тәэсир итә торган җимнәр кулланырга киңәш итә. Аларны эшче кырмыскалар ояларына ташый һәм бу колонияне аналары белән бергә юк итәргә мөмкинлек бирә. Бу ысул кыска вакытлы гына нәтиҗә бирә торган аэрозольләргә караганда ышанычлырак. Шулай ук барьер ысуллар кулланыла, мәсәлән, плинтусларны, ишек тирәләрен махсус составлар белән эшкәртергә була.
Зәһәр исле ысуллар, мәсәлән, уксус яки эфир майлары куллану бөҗәкләрне бары тик вакытлыча гына куркытып тора, ә проблеманың чыганагын юк итми. Әгәр кырмыскалар кабат барлыкка килә икән, димәк аларның колониясе тулысынча юк ителмәгән һәм аларга яшәү өчен шартлар сакланып калган.
Масштаблы зарарлану булганда, бигрәк тә күпфатирлы йортларда, белгеч профессиональ дезинсекциягә мөрәҗәгать итәргә куша. Кырмыскалар куркыныч авырулар таратмый, әмма аларның булуы уңайсызлык тудыра, шуңа күрә үз вакытында тиешле чаралар куллану һәм бу чараларны дөрес сайлау алардан озакка котылырга булыша.