Ростов-на-Дону шәһәрендә яшәүче ир-атның эченнән алты ручка һәм фломастер алганнар. Бу турыда «Вести» каналы хәбәр итте.
45 яшьлек ир-атка табиблар ярдәм күрсәткән. Алар гастроскоп ярдәмендә бу кешенең эчендәге очлы предметларны чыгарган.
Шәһәр башлыгы Алексей Логвиненко үзенең телеграм-каналында бу вакыйга турында язган.
Моңа кадәр әлеге ир-ат берничә тапкыр тикшеренү узган, проблемасы турында белгән. Аңа операция ясарга тәкъдим иткән булганнар, ләкин ир-ат ярдәмнән баш тарткан.
Канцелярия товарларын кешенең эченнән чыгару процессы 30 минут чамасы дәвам иткән. Ир-атны дүрт көннән соң хастаханәдән чыгарганнар.
Ручка һәм фломастерлар ир-атның ашказанына ничек эләгүе хәбәр ителми.