Уралның Кировград шәһәрендә бер ир-ат вәхшиләрчә җинаять кылган. Ул көнкүреш ызгыш аркасында иптәшен үтерүдә гаепләнә. Ике ир-ат арасында ызгыш җыештырылмаган бәдрәф аркасында килеп чыккан. Бу хакта РЕН ТВ сайты яза.
Бу җинаять 10 сентябрьдә ук эшләнгән, әмма нечкәлекләре хәзер генә билгеле булган.
Гаепләнүче дус кызы белән бергә иптәше янына эчәргә килгән. Эчәргә утырганчы, кунак кулларын юып килергә теләгән. Ә бәдрәф җыештырылмаган булган – хуҗа кеше үзе артыннан суны агызуны кирәк тапмаган, күрәсең.
Кунакка килгән ир-ат моның өчен шелтә белдергәч, фатир хуҗасы аны «послать» иткән. Ә үзенә карата мондый мөнәсәбәттән ачуы чыккан кунак хуҗаны үтергәнче кыйнаган – дустын типкәләгән, урындык белән кыйнаган, дип хәбәр итте Свердловск өлкәсе буенча Эчке эшләр министрлыгының матбугат хезмәте җитәкчесе Валерий Горелых.
Үтерүдә шикләнелгән ир-атны бик тиз кулга алалар, ул гаебен таныган. Хәзер аны сак астына алу мәсьәләсе карала.