Бер ир-ат эшләп торган бензопила белән кафедагы кешеләргә һөҗүм иткән мизгел видеога эләккән

Находка шәһәрендә исерек ир-ат кафега кереп җәнҗал чыгарган. Ул үзе белән эшләп торган бензопила да алып килгән. Әлеге вакыйга кадрларын «Вести»каналы күрсәтте.

Беренчел мәгълүматлар буенча, вакыйга «У Арифа» дигән кафеда якшәмбе көнне кич белән була. Бер ир-ат эшләп торган бензопила күтәреп кафега керә. Ир-ат бу эшне ни сәбәпле эшләгәне әлегә билгеле түгел.

Кафеда утырган клиентлар сүзләренчә, бензопила тоткан ир-ат чыннан да коралын кулланырга ниятләгән булган. Ул кафега кергәндә үк, ишек төбендә торган бер машинага пычкысы белән «тамга» салып калдырган.

Кафе кунаклары куркып калмый. Алар һөҗүм итүче ир-атны бик тиз туктата, бензопиласын тартып ала. Шулай да ул әйләнә-тирәдәге кешеләрне куркытырга өлгерә. Видео язмаларында хатын-кызларның елавы, кычкыруы ишетелә.

Бу вакыйгадан соң, полиция тикшерү башлаган. Кафе клиентларының берсе дә бензопила тоткан ир-ат өстеннән гариза язып мөрәҗәгать итмәгән.