Бер ир-ат өч кешене атып үтергән
Бергә яши торган хатынының әти-әнисен, тагын бер танышын үтергән ир-атның үзенең дә мәетен тапканнар.
23 октябрьдә Башкортстанның Мәләвез районындагы Ергән авылында 59 яшьлек хатын һәм 57 яшьлек ир-ат мәетен тапканнар. Аларны атып үтергәннәр. Бу турыда «Башинформ» агентлыгы хәбәр итте.
Тикшерү комитеты җинаять эше ачкан. Хокук саклау органнары тиз арада җинаятьченең кем булуын билгеләгән. Ул Салават шәһәрендә яшәүче 58 яшьлек ир-ат булып чыккан. Бу кешенең Салават шәһәрендә яшәгән 57 яшьлек ир-ат үлеменә дә катнашы булуын ачыклаганнар.
Тикшерү версиясе буенча, 19–23 октябрь көннәрендә җинаятьтә шикләнелүче кеше 57 яшьлек танышы белән талашкан. Ул танышыннан зур күләмдә акча алып торган булган. Талаш вакытында җинаятьче танышының башына һәм гәүдәсенә аткан. Ир-ат урында ук үлгән. Җинаять эзен яшерү өчен, бу мәрхүмнең машинасын гаражга алып киткән. Мәетне исә бакчасындагы базга яшереп куйган.
Җинаятьтә шикләнелүче ир-атка акча бик кирәк булган. Ул бергә яши торган хатынының Ерган авылында яшәүче әти-әнисе янына килгән. Алардан да акча алып тормакчы булган. Монда да талаш чыккан. Шуннан соң ул хатынының әти-әнисен дә атып үтергән. Җинаять эзләрен яшереп тормаган, Салават шәһәренә кайтып киткән.
Шулай итеп бу ир-ат өч кешене атып үтергән. Соңрак өч кеше үлемендә шикләнелгән ир-атның үзенең дә мәетен тапканнар, диелгән әлеге хәбәрдә. Аның ничек үлүе турында хәбәр ителми.
