Бер ир-ат 12 яшьлек ике кызны берьюлы көчләгән

Иркутск өлкәсенең Хомутово авылында 19 октябрьдә көндез бер ир-ат 12 яшьлек ике кызны көчләгән. Җинаятьче йөрәге авырта дип алдап, ике баланы кеше йөрми торган урынга алып киткән. Шунда ул ике кызны да көчләгән. Корбаннарын пычак белән куркытып торган. Бу турыда Россия Тикшерү комитетына сылтама белән "Вести" каналы хәбәр итте.

Балаларны көчләгәч, җинаятьче кача. Аның урманда яшәве ачыклана. Берничә көннән бу ир-ат ашарга эзләп авылга килә. Аны азык-төлек кибетендә күреп алалар.

Биредә яшәүче ике кеше көчләүдә шикләнелүчене танып ала. Аны туктатып, полиция килгәнче тотып торалар. «Ул каршы килмәде. Йөрәге авырта дип зарланды», — дип сөйләгән аны тоткарлаган ир-ат.

Хокук саклау органнары бу кешенең шәхесен ачыклый. Бу ир ике баланы көчләгән өчен эзләнә торган 51 яшьлек кеше булып чыга.

Сорау алганда, ул үз гаебен таный. Бу кешенең узган язда гына төрмәдән чыгуы ачыклана. Аны шундый ук җинаять өчен хөкем иткән булганнар.