Бер хатын өч баласын урманда өшетеп үтерергә маташкан
Эте белән йөрергә чыккан ир-ат урманда өч бала һәм аларның анасын табып алган да полиция чакырткан.
Мәскәү өлкәсендә 33 яшьлек хатын өч баласын урманга алып барган һәм өс киемнәрен салдырып, өшетеп үтерергә маташкан. Аларны шаһитлар күреп алган һәм полициягә хәбәр иткән. Балалар төрле дәрәҗәдә өшегән, аларны хастаханәгә алып киткәннәр. Хатынның үзенең дә аяклары өшегән. Бу турыда Россия Тикшерү комитетының Мәскәү буенча Тикшерү идарәсенә сылтама белән РЕН ТВ хәбәр итте.
Тикшерүчеләр «үзенә ярдәм итә алмый торган халәттәге ике яки аннан да күбрәк кешене, шул исәптән нәни балаларны үтерергә маташу» маддәсе буенча җинаять эше ачкан.
Вакыйга 11 февральдә була. Якынча белешмә буенча, хатын үзе дә чишенгән. Ул балалары белән бергә катып үлеп, иреннән үч алмакчы булган. Хәзер хатынны да хастаханәгә салганнар. Аның психик халәтен ачыклау өчен экспертиза билгеләнгән.
Наталия исемле бу хатын тикшерүчеләр белән сөйләшкәндә үзенең азыгына нидер сипкәннәр дип әйтә. Имеш, моны аның бергә яши торган ире эшләгән. Хәзер моны ачыклау эшләре бара.
Бәхеткә, әлеге вакыйганы узып баручы ир-ат күреп ала. Ул бирегә эте белән йөрергә чыккан булган. Ир-ат хокук саклаучыларга хәбәр итә. Полиция хезмәткәрләре алты айлык баланы ала. Бу арада Наталия ике баласы белән качып китәргә маташа, тик аны куып тоталар, диелә хәбәрдә.
Россия Президенты каршында бала хокукларын яклау буенча вәкаләтле вәкил Анна Кузнецова салкында өшеп үлә язган өч баланың икесен реанимациядән гомуми палатага күчерүләре сөйләгән. Балаларның әле ун яшь тә тулмаган олырагы интенсив терапия бүлегендә ята. Бу турыда «Вести» каналы хәбәр итте.
Балаларны табиблар, психологлар, Мәскәүнең социаль яклау департаменты волонтерлары күзәтеп торачак.
Анна Күзнецова балаларны Азиз исемле егет коткаруын әйткән. Азиз өши башлаган балаларны тапкач ук полиция чакырган, табиблар килеп җиткәнче үзе дә алар янында торып торган, диелә хәбәрдә.