Бер егет 14 яшьлек баланы көчләгәч, урам буйлап ыштансыз йөгереп йөргән - видео
24 яшьлек егет җинаять урынында курткасын, джинс чалбарын, эчке киемнәрен, аяк киемен, бер оекбашын калдырган.
Мәскәүдә күпкатлы йорт подъездында бер егет 14 яшьлек кызны көчләгән. Егет наркотиклардан исерек булган. Баланы көчләгәч, ул күрше йорт ишегалдында качмакчы булган. Җинаятьтә шикләнелүче бу кеше урам буйлап ыштансыз һәм яланаяк килеш йөгереп йөргән. Бу хәлне күзәтү камерасы төшереп торган. Әлеге видеоны «Вести» каналы күрсәтте.
Вакыйга 16 февральдә Народное Ополчение урамында була. Мәскәүдә яшәүче 24 яшьлек егет 14 яшьлек кыз артыннан бара. Кыз үзе яши торган йорт подъездына керә, җинаятьче дә аның артыннан калмый. Егет баланы лифтта тугызынчы катка менәргә мәҗбүр итә. Кызга берничә тапкыр суга һәм көчли.
Җинаятьче баладан телефонын да таләп иткән. Ләкин бу йортта яшәүче кемдер килеп чыккан һәм җинаятьче тиз арада качып киткән. Ул җинаять урынында курткасын, джинс чалбарын, эчке киемнәрен, аяк киемен, бер оекбашын да калдырган, диелгән әлеге хәбәрдә.
Егет шулай ярымшәрә килеш күрше йортка таба йөгергән. Берничә минуттан аны полиция хезмәткәрләре тоткарлаган. Видео кадрларыннан күренгәнчә, җинаятьче ычкынмакчы була, тик аны тотып калалар.
МК сайты мәгълүматы буенча, җинаятьчене тоткарлаганнар. Аны 8 дән 15 елга кадәр ирегеннән мәхрүм итүләре ихтимал.