Согуд Гарәбстанының Әл-Баха һәм Әл-Намас районнарында кар яуган. Лайф сайты белешмәсе буенча, бу – илнең көньяк-көнбатышындагы районнар.
Юлларны кар баскан. Карга батып калган дөяләргә коткаручылар ярдәм иткән. Биредә яшәүчеләр исә кар күреп сөенә, дип язалар «Телеграм» каналларда.
Sky News Arabia телеканалы белешмәсе буенча, торак пунктларга керү-чыгу юллары бөтенләй ябылган, машиналар кар көртләрендә батып калган. Кар чистарту өчен төзелеш техникасын чыгарганнар, ләкин ул да булыша алмый, дип язалар.
Мәктәпләр исә читтән торып укытуга күчкән.
Ачык чыганаклардагы белешмә буенча, Согуд Гарәбстанында кырау төшми, кар бөтенләй яумый диярлек. Кышын биредә уртача +22 градус, уртача минималь температура +11 градус, уртача максималь температура +28 градус.
2020 елда Кызыл диңгездән төньяк-көнбатышка таба 190 км ераклыкта Табука чүлендә кар яуган. 2018 елның ноябрендә исә Мәккә тирәсендә карлы яңгыр булган.