Бер айлык баланы фатирдагы эт талап бетергән

Санкт-Петербург шәһәрендә бер фатирда күкрәк баласына джек-рассел токымлы эт ташланган. Өйдә яши торган хайван гаилә әгъзасы кебек булган. Шуңа күрә әни кеше сабыен эт янында калдырырга да курыкмаган. Бу турыда «Комсомольская правда» хәбәр итте.

Фаҗига булган көнне әни кеше бер мизгелгә игътибарын читкә юнәлткән. Шул чакта эт сабыйга ташланган һәм вәхшиләрчә талаган.

«Баланы хастаханәгә салдылар. Аның бот сөяге сынган, күкрәк читлеге, куллары һәм аяклары тешләнеп беткән, бала авыр хәлдә. Сабый педиатрия университетында», — дип сөйләгән «КП» сайтының үз чыганагы. 

Баланы 30 яшьлек анасы ялгызы тәрбияли. Гаилә уңышсыз гаиләләр хисабында тора.

4 июньдә бу хатынга карата балигъ булмаган баланы тәрбияләү буенча вазифаларын үтәмәгән өчен административ протокол төзегән булганнар.

«КП» сайты хәбәрчесе күршеләр белән аралашкан. 30 яшьлек Елена бер айлык баласын яхшылап тәрбияли алмаган. Күрше-күлән дә бәла буласын алдан ук сизенгән. «Еленаның анасы зур түрә булып эшләде. Лена үзе музыка мәктәбен, аннары консерваторияне тәмамлады. Аның белеме яхшы. Ул өйләргә барып балаларга дәресләр бирә иде. Тик аннары аларның тормышында нидер үзгәрде», — ди күршеләр.

Еленаның анасы Татьяна пенсиягә чыга һәм өйдә генә утыра башлый. Аны күршеләре күптән күрмәгән инде. Лена үзе исә «үзен сәер» тота. 

«Алар беркем белән аралашмады. Тәрәзәләрен дә ачмадылар. Башта аларның ике эте һәм өч песие бар иде. Алар этне беркайчан да урамга алып чыгып йөртмәде. Өйләрен җилләтмәделәр дә. Аларның фатирыннан гел сасы ис килде, аннары ике эт тә үлде», — дип сөйлиләр.

Берничә ел элек Еленаның ире барлыкка килә. Күршеләре сүзләренчә, ул ничек тиз барлыкка килсә, шулай кисәк кенә юкка да чыга. Джек-рассел токымлы этне алар күптән түгел генә ала, эт бик агрессив була.

«Бала турында күршеләр белмәде дә. Бик сәер, без бала елаганын ишетмәдек тә. Алар урамга чыгып йөрми. Этне балконнан гына күрдек. Ул гел ырылдап торды, аны да урамга алып чыкмадылар, балконда гына йөрттеләр. Хайван кешеләргә ияләнмәгән, бу фатирда бәла буласын көткән идек», — дип сөйли күршеләр.

Күршеләр сүзләренчә, бу гаилә коронавирус йоктырган, шул исәптән бала да. Фаҗига булырга берничә көн алданрак Еленаның анасы хастаханәдә үлгән. 

«Елена үзе полициягә әйткәнчә, ул да, бала да коронавирус белән авырый», — ди күршеләр.