Бензин ташый торган машина белән авариядә табиблар бригадасы үлгән, ике йортка ут капкан

30 августта иртә белән Ярославль шәһәре янында ашыгыч ярдәм машинасы, җиңел машина һәм бензин ташый торган машина бәрелешкән. Биредә өч кешедән торган табиблар бригадасы һәлак булган. Бу турыда РЕН ТВ хәбәр итте.

Ярославль өлкәсенең Воробино авылында юл һәлакәтеннән соң ике шәхси йортка ут капкан. Янгын 200 квадрат метр мәйданда булган. 

Әлеге фаҗигадән соң җинаять эше ачылган. Бу турыда Тикшерү комитеты хәбәр иткән.

«Вести» каналы белешмәсе буенча, авариядән соң ягулык түгелгән. Машиналар белән бергә, шәхси йортка да ут капкан. Табиблар бригадасы һәлак булуын төбәк губернаторы Михаил Евраев раслаган.

«Ягулык түгелгән, ашыгыч ярдәм машинасына ут капкан, аннары ут күршедәге йортларга күчкән. Кызганычка, бөтен бригада һәлак булды. Туганнарының тирән кайгысын уртаклашам. Мәрхүмнәрнең гаиләләренә ярдәм итәрбез», – дип язган ул.