Бензин бәясе 100 сум булырмы?
Ел азагына бензинның 1 литры 100 сум булыр дигән хәбәр таралды.
Россия Хөкүмәте бензин бәясе 100 сум булу ихтималын кире кага. Вице-премьер Дмитрий Козак регион хакимиятләре вәкилләре белән очрашуда мондый хәлне китереп чыгармас өчен, хакимиятнең кораллары җитәрлек дип әйткән. Бу турыда РИА Новости хәбәр итте.
"Бүген матбугат чаралары, кайсыбер экспертлар, компания вәкилләре ел азагына бензин буенча апокалиптик фаразлар ясый - бензинның 1 литры 100 сум булыр дип әйтә. Бу - мөмкин хәл түгел. Хакимиятнең бу очракны көйләү өчен барлык кораллары да бар", - дип әйткән Козак.
- Россия финанс министры Антон Силуанов нефть бәясе арту сәбәпле, нефте табучы компанияләргә аны тышкы базарга сату файдалырак дип әйткән. Ил эчендә сату табышлы түгел. Шуңа күрә Россиядә ягулыкка бәя арту күзәтелә, дип язган идек.