Белорет районында яшәүче хатынны ире тереләй яндырып үтергән
Ир хатынын кыйнаган, аннары бензин сибеп ут төрткән. Табиблар ярдәм итсә дә, кызганычка каршы, тәне пешкән хатын хастаханәдә вафат булган.
Башкортстанның Белорет районында яшәүче 63 яшьлек ир-атка карата «аеруча вәхши ысул белән үтерергә маташу» маддәсе буенча җинаять эше ачылган. Ул хатынын тереләй яндырып үтерергә маташкан. Бу турыда «Башинформ» хәбәр итте.
Россия Тикшерү комитетының башкортстан буенча Тикшерү идарәсе белешмәсе буенча, 22 мартта ир белән хатын талаша. 63 яшьлек ир-ат 63 яшьлек хатынын кыйный. Хатын ире кыйнау турында туганнарына хәбәр итәргә өлгерә, тик үзе чыгып кача алмый.
«Берничә тапкыр сукканнан соң, ир хатынына бензин сибә һәм ут төртә. Урынга килеп җиткән туганнары полиция чакыра. Хокук саклаучылар һәм коткаручылар ишекне ватып ачып кереп, хатынны коткаралар. Аның тәненең 80 проценты пешкән. Хатынны хастаханәгә салганнар. Ләкин табиблар ярдәм итүгә карамастан, шул ук көнне кичке якта хатын вафат була. Ир үзе исә яну продуктлары белән агуланган һәм аңын югалткан», — дип аңлатканнар ведомствода.
Ирне сак астына алганнар. Җинаять эшен тикшерү бара, диелә хәбәрдә.