РИА Новости хәбәр итүенчә, Белгород өлкәсендә Көнбатыш хәрби округның полигонында террор акты булган. СНГ илләренең берсеннән килгән 2 кеше атыш оештырганнар. Алар хәрби хезмәткә үз теләкләре белән килүчеләргә ата башлыйлар. Террорчыларны атып үтерәләр.
Оборона министрлыгы хәбәр итүенчә, 11 кеше үлгән, 15 кеше тән җәрәхәтләре алган.
Теракт иртән 10да булган. Әмма аның хакында 11 сәгатьтән соң гына билгеле булды.
«Царьград» сайты «һәлак булучылар 22, яраланучылар 16» дип яза. Бу сайт мәгълүматлары буенча, атучылар өчәү булган, берсе кача алган. Һәлак булучылар – мобилизацияләнүчеләр, диелә. Конфликтны «дини/милли низаг булгандыр» дип тә, «атучылар – Украинадан килгән диверсантлар» дип тә фаразлыйлар. Атучыларны Таҗикстаннан, дип тә язалар.
