Бүген иртән Украина кораллы көчләре Белгородны кабат утка тотты. Бер снаряд күп катлы йорт янына төшкән, һәм автомобильләргә ут капкан.
35 яшьләр тирәсендәге бер хатын һәлак булган мизгел видеокамерага эләккән. Ул сигезенче яртыда Есенин урамында 2 этен урамда йөртергә алып чыккан булган. Снаряд нәкъ аның каршысында шартлый. Ул үзе дә, 2 эте дә шунда ук үлгән.
Өстәмә: соңрак этләрнең берсе исән калганы билгеле булды. Ул шартлау вакытында аңын югалткан булган, бераздан аңына килгән һәм үлгән хуҗасы яныннан китмәгән.
Шәһәрне аттырганда 2 кеше яраланган. Шәһәр бала таптыру йортларының берсенә зыян килгән.
Белгород телеграм-каналларында шәһәрне аттырган мизгелләр таралды.
Кичә Белгородта 2 күп катлы йорт һәм «Белгород Арена» зыян күрүе турында хәбәр булган иде. Шәһәрне Чехиядә ясалган «Вампир» ракеталары белән аттырганнар, дип хәбәр итә SHOT. Аларның сигезе бәреп төшерелгән. Җиргә төшкән ярчыклар белән 7 кеше яраланган, аларның берсе авыр хәлдә.
