Белгород янында бәреп төшерелгән самолет экипажы Оренбургтан булган

Оренбург губернаторы Денис Паслерның телеграм-каналында кичә Белгород өлкәсендә бәреп төшерелгән транспорт самолетының экипажы турында мәгълүмат чыкты. Алар Оренбург хәрби-транспорт полкында хезмәт иткән.

Очкычның командиры Станислав Беззубкин – Тамбовтан. Калганнары – командирның ярдәмчесе Владислав Чмирев; штурман Алексей Высокин; бортинженер Андрей Пилуев; борттехник Сергей Житенев; бортрадист Игорь Саблинский, дип яза orenday.ru.

Оренбургта стихияле рәвештә мемориал барлыкка килгән, һәлак булучылар истәлегенә чәчәкләр китерәләр.

Самолетта Россия хәрбиләре белән алмашу өчен 65 хәрби әсир булган, моннан тыш – 3 озатып баручы кеше. Алар барысы да һәлак булды.

Губернатор хәбәр итүенчә, экипаж соң чиктә самолетны кырга алып чыгып китә алган һәм, шулай итеп, очкычны торак пункт, кешеләрнең йортларына төшермәгән. Аларны дәүләт бүләгенә тәкъдим итәчәкләр.

• Оборона министрлыгы хәбәр итүенчә, «Ил-76» самолетына Украинаның Харьков өлкәсендәге зенит-ракета комплексыннан атканнар. Россия Тышкы эшләр министрлыгы самолетны бәреп төшерүдә Украинаны гаепләде. Думаның Оборона буенча комитеты җитәкчесе Андрей Картаполов әйтүенчә, кичә бу әсирләрне Россия әсирләренә алыштырырга тиеш булганнар. Бу – «Ил-76» самолетында әсирләрнең бер өлеше булган, калганнары соңрак очып киләчәк икенче самолетта була, анысын кире боралар. Оборона министрлыгы белдерүченә, Украина әсирләрне һава транпсорты белән китерелүен белгән. Россия БМОда һәлакәткә кагылышлы утырыш уздыруны сорады.
• Украина пабликлары самолет бәреп төшерелү турында мәгълүмат урнаштырды, соңынннан алар алып ташланды, яки үзгәрешләр кертелде. Украина хәрби ведомствосы, әсирләрне ничек итеп алып килүләре турында мәгълүмат бирелмәде, шулай ук Белгород тирәсендә һава транспортына куркынычсызлык тудыру кирәклеге әйтелмәде, дип бара. Украина президенты Владимир Зеленский халкыкара тикшерү сорады, дип яза «Коммерсантъ». «РБК-Украина» язуынча, Украина президенты туган көне уңаеннан (Зеленскийның туган көне 25 гыйнварда) кабул итүләр һәм очрашулар булмаячагын белдергән.