![Базиликтан «песто» соусы рецепты](https://intertat.tatar/resize/shd/images/uploads/news/2023/8/2/0d9fae6e141a76357e8c315d45a642d9.jpg)
Бакчада үстергән яшел тәмләткеч – базилик, ягъни рәйхан яфракларыннан итальянча тәмле соус әзерләп була. Бу соусны ипигә ягып яки спагетти, макароннар, кыздырылган йомырка белән дә ашарга тәмле. Пиццага салырга мөмкин. Итальянча «песто» соусы рецептын «Атна вакыйгалары» газетасы тәкъдим итә.
Соус ясау өчен кирәк: 50 грамм базилик, ягъни рәйхан яфрагы, 50 грамм пармезан кебек каты сыр, 4-5 аш кашыгы зәйтүн мае, 3 тырнак сарымсак, 25 грамм эрбет (кедр) чикләвеге, бер чеметем тоз.
Соусны блендерда ясарга була. Иң мөһиме – барысын да бик вак итеп турарга. Мәсәлән, рәйхан яфракларын турарга, сырны вак угычтан уарга, сарымсакны сытарга мөмкин. Соңыннан сыек май, эрбет чикләвеге һәм тоз салып бутарга. Эрбетнеке булмаса, вакланган әстерхан, урман яки бадәм чикләвеге дә ярый.