Базарда азык-төлек алганда сату урынының чисталыгына һәм товарның тышкы кыяфәтенә игътибар итәргә кирәк. Бу хакта РИА Новостига Роспотребнадзорда сөйләгәннәр.
«Базарда йөргәндә сату урыннарының чисталыгына, сатучының тышкы кыяфәтенә, шулай ук товарларның килеп чыгышын, сыйфатын һәм иминлеген раслый торган документлар булуга игътибар итегез. Азык-төлекнең тышкы кыяфәтенә аерым игътибарлы булырга кирәк: аларда бозылу билгеләре, тәмсез ис булмаска тиеш», – диелә хәбәрдә.
Санкцияләнмәгән, суыткыч җиһазлар һәм тиешле санитар шартлар булмаган сату урыннарында сөт һәм ит ризыклары, балык, кремлы кондитер эшләнмәләре, шулай ук кулинар эшләнмәләр кебек тиз бозыла торган азык-төлек сатып алмаска кирәк, дигәннәр ведомствода.
Базарда җиләк-җимеш һәм яшелчә сатып алганда игътибар белән карарга кирәк. Аларда черегән, күгәргән урыннар булмаска тиеш, кабыклары да зарарланмаган булсын.
«Исегездә тотыгыз, билгеләнгән урыннарда «кулдан» азык-төлек сатып алу кискен эчәк инфекцияләре һәм азык-төлек белән агулану йоктыру куркынычы зур. Шуңа күрә сәламәтлеккә янаган куркынычларны киметү өчен сатыла торган товарларның сыйфатын контрольдә тотуны тәэмин итә һәм барлык гигиена нормаларын үти торган кибетләргә һәм сәүдә нокталарына өстенлек бирергә кирәк», – дип йомгаклаганнар Роспотребнадзорда.