«Бәхетем, бик иртә киттең» – волонтерны гәүдәсе белән каплап коткарган хәрбинең кызы туды

«Ул шундый шат күңелле, аралашучан, игелекле иде»

Виталий Шипихин 2000 елның 4 маенда Чаллыда туа. 21нче мәктәпне тәмамлый. ЗЯБ бистәсенең 15нче комплексында яши. 2022 елның 25 октябрендә өлешчә мобилизация буенча алгы сафка эләгә. Бу хакта «Татар-информ»да Эльза Кузнецова яза.

10 айлык хезмәте вакытында ул кыска вакытлы ялда булып китәргә, туганнары белән очрашырга өлгерә.

Виталий белән таныш булганнар аның турында бары тик яхшы сүзләр генә сөйли.

«Без гуманитар ярдәм ташу белән шөгыльләнәбез. Алгы сафта Виталикны очраткач, аның шундый шат күңелле, аралашучан, игелекле кеше икәнен күрдек. Беренче тапкыр гына очрашуыбызга карамастан, безне туганнары кебек каршы алды», – дип сөйли аның турында волонтер Айрат Закиров.

2023 елның 20 июлендә волонтерлар хәрбиләргә гуманитар ярдәм алып килә. Кич җиткән була, һәм алар төн кунарга кала. Шул арада аларны чолгап алалар, ата башлыйлар һәм «Кулларыгызны баш артына куегыз, ятыгыз!» – дип кычкыралар.

Бабай кушаматлы волонтер сөйләвенчә, Виталий аны коткарып кала, ә үзе һәлак була.

«Ул мине үз гәүдәсе белән каплады. Ул минем каршыма килеп басты, пуля аның нәкъ йөрәгенә эләкте. Ә мин аның артында басып тора идем. Безгә 15 кеше һөҗүм итте, чолгап алдылар», – дип сөйли ир-ат.

Гуманитар йөк ташучылардан булган тагын бер волонтер Илдус Әхмәтгәрәев Виталийның игелекле, ярдәмчел, аңлаучан кеше булуын әйтә. «Ул минем улым белән бергә булган, аның кулында үлгән», – дип сөйли ул.

Үлем белән очрашкан волонтерлар куркып калмаган, алар якташларына ярдәм итүләрен дәвам итә. Алдагы көннәрдә алар кабат алгы сызыкка гуманитар йөк алып барырга әзерләнә.

Ире үлгәч, Валерия мондый юллар язган: «Авыр туфрагың җиңел булсын. Син һәрвакыт минем йөрәгемдә булачаксың. Син минем өчен һәрвакыт иң яхшы ир, егет, дус, абый булдың. Мин сине беркайчан да онытмаячакмын. Тыныч йокла, бәхетем. Син бик иртә киттең. Син һәрвакыт янәшәмдә. Мин сине бик яратам».

Батырлык ордены хәрбинең гаиләсендә саклана. Узган ел әлеге бүләкне Валерия шәһәр мэры кулыннан алган.

«Нәселнең дәвам итүе бүген сезнең күз алдыгызда»

Яңа туган сабыйны көчле алкышлар белән каршы алалар. Кызга Виталина дигән сирәк һәм матур исем биргәннәр. Бу латин исеме Виталийдан алынган. Vitalis сүзе латинчадан тәрҗемә иткәндә «тормыш белән тулы» дигәнне аңлата.

Әнисе исемне әтисенең исеме белән туры китереп сайлауларын әйтә. «Бу – сирәк, матур исем һәм иремнең исеме белән бер үк диярлек. Виталина Витальевна», – ди ул.

Котлау сүзләрен автошәһәр мэры Наил Мәһдиев та җиткергән.

«Кызганыч, Виталий илебез мәнфәгатьләрен яклап һәлак булды. Үлемнән соң Батырлык ордены белән бүләкләнде. Без барыбыз да моны онытмабыз. Без моны һәрвакыт истә тотачакбыз. Әлбәттә, бүген – сезнең күз алдыгызда нәселнең дәвам итүе», — диде шәһәр башлыгы.

Виталинаны тәрбияләргә иң якыннары ярдәм итәчәк. Ә кызның туганнары күп – бабайлары, әбиләре, әти-әнисенең абый-апалары.

Чаллы мэры Наил Мәһдиев бәбинең әнисенә 100 мең сум салынган конверт тапшырды. Республикадан – яңа туган бала өчен комплект. Шәһәрдәге хәрбиләрнең гаиләләрендә барлыгы 43 бала туган: 23 кыз һәм 20 малай.