Батыр хатын, сумкасын урларга теләгән каракны егып, полиция килгәнче тотып тора: "Син минем балаларымны ризыксыз калдырмакчы идеңме?" (видео)
Бу хәл Киров өлкәсендә була. Вакыйганың шаһитлары аны видеога яздырып алган.
Кировта яшәгән хатын-кызның көпә-көндез сумкасын алып качалар. Әмма ханым куркаклардан булмый - ул каракны егып сала, өстенә сузылып ята һәм полиция килгәнче тотып тора. "Балчык аша! Балаларымны акчасыз, ризыксыз калдырмакчы идеңме?" - ди ул. Зур гәүдәле хатын астында калган карак сүгенә, ялына, кычкыра, әмма котыла алмый. Карак ир дә, батыр ханым да бик нык сүгенәләр.
Бу вакыйганың шаһитлары - үсмер малайлар хатынның бу гамәлләренә тыкшынмый. Ханымга су гына алып килеп бирәләр.
Ир шулкадәр курыккан була - полиция килгәч, ул бик рәхәтләнеп кулларын богаулата, "тотыгыз җинаятьчене, алайса ул кача!" - дип хатынны тоткарлауны сорап кычкыра.
