Кытайның Шанхай шәһәре табиблары, бик катлаулы операция ясап, пациентның гомерен саклап калган. Имгәнү аркасында ир-атның муен умырткалары урыныннан нык күчкән һәм башы гәүдәсеннән аерылып чыккан диярлек. Бу хакта Кытайның үзәк телевидениесенә (CCTV) сылтама белән РИА Новости яза.
Производствода роботлаштырылган кул бу ир-атның муенына бик каты суга, нәтиҗәдә, аның муен умырткаларына бик зур зыян килә, ир-атны паралич суга, һәм йөрәге туктый. Соңрак аның йөрәген эшләтеп җибәрәләр.
Имгәнгән ир-атны Шанхайдагы «Чанчжэн» хастаханәсенә китерәләр. Табиблар аның муен умырткаларының бик нык урыныннан күчүен ачыклый, бу «гәүдәнең һәм башның аерылуына» охшаш була. Арка мие зарарланган, нервлары һәм кан тамырлары өзелгән була.
«30 елдан артык табиб булып эшләү чорында миңа очраган иң катлаулы очрак булды. Без дөнья кадәр кытай һәм чит ил әдәбияты өйрәндек, тик муен умырткалары аерылуның бу дәрәҗәдә җитди очрагын һәм бигрәк тә дәвалаудан соң пациентның исән калу очрагын күрмәдек», – дип сөйләгән хастаханәнең муен умырткасы хирургиясе бүлеге мөдире Чэнь Хуацзян.
Өч сәгать барган операциядә табиблар бик зур гематома алган, аерылган муен умырткаларын торгызган, шулай ук, муен умырткалары тотрыклы булсын өчен, махсус тимер фиксатор беркеткән.
Операциядән соң пациент аңына килгән, аның яшәү күрсәткечләре дә әкренләп нормалаша. Аны хастаханәдән чыгарганнар, ул үзлектән җилкәләрен һәм беләкләрен селкетә ала. Әкренләп тернәкләнү озак вакытка сузылачак, диелә хәбәрдә.