Басуга бәрәңге җыярга килгән әбине ачулы ир-ат машинасы белән берничә тапкыр таптаган
Ленинград өлкәсендә машина йөртүче ир-ат 70 яшьлек әби белән талашкан, аннары машинасы белән әбине берничә тапкыр таптаган. Бу турыда РЕН ТВ хәбәр итте.
Әлеге хәл 2022 елның сентябрендә Гатчина районының Шаглино авылында булган.
Ир-ат басуга килгән. Биредә ул бәрәңге җыючы әбине күргән. Аннары алар талаша башлаган. Ярсыган ир-ат машинасына утырган һәм әбине таптарга булган.
Беренче тапкыр машина белән бәрдергәч, әби егылган, аннары машина артка чигенгән һәм кабат газга баскан.
«Ул аның аркасын һәм уң кулын таптаган, әбинең умыртка баганасы сынган», – дигән канал чыганагы. Өстәвенә, әбинең оча сөяге дә имгәнгән.
Шуннан соң җинаять эше ачылган. Моңа кадәр дә хөкем ителгән 58 яшьлек ир-атны 8 июньдә кулга алганнар, диелә хәбәрдә.