Башкортстанның Белорет районында яшәүче ир-атны «кеше урлау», «талау», «машина урлау» маддәләре буенча хөкем иттеләр. Бу турыда «Башинформ» прокуратурага сылтама белән яза.
Ведомство белешмәсе буенча, 2021 елның августында бу ир-ат сөйгән кызын эзли, эзләшергә дусларын да чакыра. Кызның яшәгән урынын ачыклау өчен, бу ир-ат сөйгән кызының туганнарын – ир белән хатынны урлый. Урланган ир белән хатынны Уфага алып китәләр. Аңа кадәр ирне кыйныйлар, яныйлар. Уфага урланган ирнең машинасына утырып баралар.
Уфада сөйгән кызын табып, алдалап өйдән чыгаралар. Аннары сөйгән кызны, аның туган апасы белән ирен машинада утыртып торалар. Соңрак ир белән хатын машинадан чыгып кача һәм хокук саклаучыларга мөрәҗәгать итә.
Җинаятьче ир-ат исә машинадан ике дустын чыгара, сөйгән кызы белән бергә кала һәм аны Аургазы районына алып китә. Шунда кибеткә керә, кибетчегә борычлы газ сиптерә, азык-төлек урлый.
Судта бу кеше гаебен танымый. Аны 9 ел да 2 айга ирегеннән мәхрүм итәләр, диелә хәбәрдә.