Башкортстанның Күгәрчен районында юл һәлакәтендә 4 кеше үлгән, аларның икесе – балалар. Бу турыда «Башинформ» хәбәр итте.
Башкортстанның баш автоинспекторы Владимир Севастьянов фаҗига урынына барган.
Севастьянов хәбәр иткәнчә, юл һәлакәте бүген кичке 4ләр тирәсендә Магнитогорск – Ира юлының 347нче километрында була.
Якынча белешмә буенча, «ВАЗ-2110» машинасы каршы як полосага чыккан һәм «Шевроле Ланос» машинасына бәрелгән.
Авариядә «Шевроле» машинасындагы пассажирлар – яшь кыз, 2021 һәм 2023 елда туган 2 бала «ашыгыч ярдәм» килгәнче үлгән. Машина йөртүче имгәнгән, аны хастаханәгә алып киткәннәр.
«ВАЗ-2110» машинасында ир-ат һәлак булган. 2 пассажир һәм машина йөртүче имгәнгән, аларны хастаханәгә салганнар, дигән баш автоинспектор.