Башкортстанның Күмертау шәһәрендә 46 яшьлек хатын үз ирен үтергән өчен тикшерү изоляторына озатылган. Бу хакта Башкортстан судлары матбугат хезмәте хәбәр итте, дип яза «News Bash».
Фаҗига 7 мартта була, ул вакытта гаилә пары якынлашып килүче Халыкара хатын-кызлар көнен билгеләп үтә. Табын артында бәйрәм итеп утырганда, пар арасында бәхәс чыга. Хатын, пычак алып, иренең күкрәгенә кадый. Ир җинаять урынында ук җан бирә.
Суд шикләнелүче хатынны ким дигәндә 7 майга кадәр сак астына алу карарын чыгарган.
