Башкортстанның Мәләвез районында Уфа-Оренбург юлында 19 июльдә ике җиңел машина бәрелешкән. Фаҗига иртәнге бишләр тирәсендә булган. Бу турыда «Башинформ» хәбәр итте.
Ford Focus белән Стәрлетамакта яшәүче 30 яшьлек ир-ат, каршы килә торган «Лада Ларгус» белән Сибайда яшәүче 36 яшьлек ир-ат идарә иткән.
«Авариядә ике машинаның да йөртүчесе, «Лада» машинасындагы 70 яшьлек пассажир (Зилаер районы кешесе) урында ук үлә. «Лада» машинасындагы өч пассажирны хастаханәгә озаталар, 62 яшьлек хатын (Хәйбуллин районы кешесе) хастаханәдә үлә. Тагын ике кешенең гомерен саклап калу өчен табиблар көрәшә», диелә ЮХИДИ хәбәрендә.
«Башинформ» чыганагы белешмәсе буенча, «Лада Ларгус» такси була, ул Акъяр-Уфа маршруты буенча бара. Прокуратурада бу белешмәне раслаганнар, такси рәсми булмавын әйткәннәр, диелә хәбәрдә.