Башкортстанның Балтач районында яшәүче 45 яшьлек Альбина Хәйдәршина 13нче баласын тапкан. 

БСТ каналы хәбәр итүенчә, өч килограммнан аз гына артыграк булып туган бала сау-сәламәт, хатын аны үзе УФА республика клиник хастаханәсендә тапкан. Малайга Байрас дип исем кушканнар. 

Альбина Хәйдәршина гаиләсендә алты кыз, алты малай булган, хәзер малайлар бергә артыграк. Ананың инде ике оныгы да бар.

Ufa1 каналы 2017 елда Хәйдәршиннар гаиләсеннән репортаж язган. Гаиләдә ул чагында 11 бала булган,кечкенәсе Назгөлгә нибары дүрт ай булган. Ул чагында иң өлкән кызы Элитаның да кызы булган инде, Артур һәм Альмир – студентлар. 

Винер һәм Альбина Хәйдәршиннар 1994 елда танышкан, икесе дә шушы районнан. Армиядән кайткач, Винер бер ел очрашып йөргәч, Альбинага өйләнә – бу 29 ел элек була. «11 баланы үстерү авыр да, күңелле дә. Бер чиләк бәрәңге берьюлы китеп бетә. Мантыйны ике кәстрүл пешерәбез, ул әзерләнгәч, тагын ике кәстрүл куябыз. Ипине үзебез пешерәбез, печенье, тәмле әйберләр безнең өчен кыйбат», – дигән ана. Альбина үзе гаиләдә бердәнбер бала булгач, һәрвакыт күп балалар тәрбияләү турында хыялланган булган. «Зур гаилә – минем өчен бәхет», – дигән Альбина.

Гаилә бала пособиеләре алуын, әмма аларның җитмәвен әйткән, чөнки һәр бала өчен кием ала башлагач, аз килеп чыга дигән. «Әмма мин зарланмыйм, мин балаларны дәүләт өчен түгел, үзем өчен таптым», – дигән ана.

Өлкән кызлары Элита әнисенең «батырлыгын» кабатламаячагын әйткән, өч бала җитә дигән. «Әти белән әни кайчак безнең исемнәрне озаклап искә төшерәләр», – дип көлкән кыз.

Фото Элита Хәйдәршинаныкы, видео Константин Корепановныкы.