Башкортстанда яшәүче ир-ат хатынын вәхшиләрчә кыйнаган. Имгәнгән хатын хастаханәдә вафат булган. Бу турыда «Башинформ» хәбәр итте.
Белорет районы суды биредә яшәүче 25 яшьлек ир-атка карата җинаять эшен караган. Ул «сәламәтлеккә зур зыян ясау һәм саксызлык аркасында үлемгә китерү» маддәсе буенча гаепләнгән.
Суд материалларыннан билгеле булганча, ир белән хатын талаша. Шул чакта ир ярсый һәм хатынын кыйный башлый. Ир хатынны бик каты типкәләп кыйный. Аннары ул үзе ашыгыч ярдәм чакыра.
Имгәнгән хатын икенче көнне хастаханәдә вафат була.
Суд утырышы вакытында шаһитлар да чыгыш ясый. Алар хөкем ителүче ир-атның хәмер эчеп йөрүен, хатынын гел кыйнап торуын әйтәләр. Хатын хокук саклау органнарына мөрәҗәгать иткән, тик чара күрелмәгән.
Суд карары буенча, хатынын кыйнаган ир-атны 9 елга ирегеннән мәхрүм иткәннәр. Ул каты режимлы колониядә булачак, диелә хәбәрдә.
- Быел августта Башкортстанның Белорет шәһәрендә 31 яшьлек Динә Махиянованы элекке ире үтерде, ике баласы ятим калды. Яшь хатын дус кызлары кулында җан биргән, дип язган идек.