Башкортстанда 29 яшьлек ир-ат 33 яшьлек танышын кыйнап ташлаган. Әлеге хәл көнчелек аркасында килеп чыккан. Россия Эчке эшләр министрлыгының Учалы районы буенча бүлегенә шул турыда хәбәр иткәннәр, дип яза «Башинформ».
Якынча белешмә буенча, җинаятьтә шикләнелүче 29 яшьлек ир-ат очрашып йөргән кызын урамда кибет янында көтеп тора. Кыз шунда эшли. Кыз кибеттән чыга һәм 29 яшьлек ир-ат янына түгел, башка ир-ат янына китеп бара. Кызны яңа сөяркәсе – биредә яшәүче 33 яшьлек ир-ат – машинада көтеп тора.
29 яшьлек ир-ат моңа ярсый, ул сөйгән кызы белән сөйләшмәкче була. Кыз исә аның белән сөйләшүдән баш тарта.
Шуннан соң 33 яшьлек ир-ат машинадан чыгып, алар янына килә. 29 яшьлек ир-ат исә үз машинасыннан агач бита ала һәм көндәшенең башына берничә тапкыр суга да качып китә.
Кыз узып баручылардан ярдәм сорый, алар ашыгыч ярдәм чакыра. Көндәшенә һөҗүм итүче 29 яшьлек ир-атны ЮХИДИ инспекторлары тиз арада тоткарлый. Аңа карата җинаять эше ачылган.