«Башкирская домохозяйка» «Кап балыкка» дигән беренче җыры белән сәхнәгә чыкты

«Башкирская домохозяйка» дигән исем белән социаль челтәрләрдә танылган Миләүшә Шәйхелисламова тәүге тапкыр сәхнәгә чыкты. Ул «Туган тел» каналы оештырган концертта татар җырчылары белән бер дәрәҗәгә чыгыш ясаган.

Блогер-җырчы сәхнәгә чыгар алдыннан сүзләрен онытуын һәм бик тә дулкынлануын әйтә. Миләүшә сәхнәгә 90нчы еллар образында – ал төстәге лосиналар, челтәрле юбка, джинсы кәчтүм киеп чыккан. Аны тамашачыга «халык мәхәббәтен яулаган башкорт хуҗабикәсе» дип тәкъдим иткәннәр.

«Дөресен әйтәм, дуслар. Мин сәхнәгә чыгарга бик курыктым. Минем кулларым калтырады, эчем авырта башлады. Кыскасы, сәхнәдә җырлау минеке түгел. Кабатлап әйтәм, мин бу җырны клипка дип кенә төшергән идем. Шаккатмалы. «Текә» булды. Кул чабып утырганыгыз өчен рәхмәт», – дип язган ул чыгышыннан соң.