Мәскәүдә «ашыгыч ярдәм» машинасы юл һәлакәтенә очраган. Биредә берничә кеше имгәнгән. Бу турыда РЕН ТВ хәбәр итте.
Авария Нахимов проспектында була. «Ашыгыч ярдәм» машинасына такси бәрелә. 47 яшьлек фельдшер хатынны авыр хәлдә хастаханәгә салганнар, аның гомере өчен табиблар көрәшә. 34 яшьлек фельдшер ир-ат, 56 яшьлек ир-ат, 19 яшьлек пациент имгәнгән. Аларны да хастаханәгә салганнар.
Видео кадрларыннан күренгәнчә, «ашыгыч ярдәм» машинасының йөртүче ягыннан көчле бәрелү булган.
Такси машинасының алгы өлеше каты җимерелгән.
«Вести» каналы белешмәсе буенча, имгәнүчеләр – «ашыгыч ярдәм» машинасын йөртүче, ике табиб һәм авыру ир-ат. Бераз соңрак билгеле булганча, табиб ир-ат хастаханәдә үлгән.
Авария китереп чыгаручы ачыкланган. Ул – такси белән идарә итүче 52 яшьлек ир-ат. Такси урам чатында светофорның кызыл төсенә чыккан.
Тикшерү эшләре бара, диелә хәбәрдә.
«Московский комсомолец» белешмәсе буенча, 19 яшьлек пациент егеткә инфаркт булган. «Ашыгыч ярдәм» аны хастаханәгә илткәндә авария килеп чыккан. 34 яшьлек фельдшер критик хәлдә хастаханәгә китерелә, һәм аны коткара алмыйлар. 47 яшьлек фельдшер хатын һәм 56 яшьлек йөртүче җитди имгәнгән. 19 яшьлек егет тә хастаханәдә, диелә хәбәрдә.