«Фотосессиягә чыкмый башлармын, ахры» – фанаткасы Марат Яруллинның муенын тешләгән

Марат Яруллин бик сәер һәм көтелмәгән хәлгә юлыккан. Магнитогорскидагы концертыннан соң тамашачысы белән фотога төшкән вакытта, бер кыз җырчының муенын тешләгән.

Ышанасызмы, фотосесия вакытында бер хатын-кыз муенымны тешләде. Мин бу турыда нәрсә дип әйтергә дә белмим… Тагын мондый хәл кабатланса, фотосессиягә чыкмый башлармын, мөгаен, – дигән ул.

Күпмедер вакыттан соң үзе: «Мин исән, елан агулы булып чыкмады», – дип шаяртып язып куйган.

Маратның виртуаль дуслары бу хәлгә шаккаткан.

«Мин бу ситуациядән шокта. Зинһар өчен, Маратны берегез дә тешләмәгез. Гыйнварда булачак концертыннан соң аның белән фотога төшәргә хыялланам»;

«Зомбига әверелмәссеңме икән?»;

«Ул урында йокы артериясе урнашкан. Мондый тешләүләрдән соң кеше үлеп китәргә дә мөмкин», – дип язганнар.

Чын күңелдән борчылып, дуслары Маратка саграк булырга киңәш итә. «Ул кызның нәрсә белән авыруын кем белгән. Анализлар тапшырырга кирәк», – дигән киңәшләр дә килгән.