Башкортстандагы авылда коймага кысылып калган хатын салкында туңып үлгән
Иртән узып баручы кешеләр коймада башы белән аска таба асылынып торган кеше мәетен тапкан.
Башкортстанның Чишмә районындагы Дим авылында коточкыч хәл булган. Бер хатын-кыз койма аша чыгарга җыенганда аралыкка кысыла һәм башы белән аска таба эленеп кала. Шулай итеп ул салкында туңып һәлак була. Бу турыда «Башинформ» агентлыгы хәбәр итте.
Иртән койма яныннан узып баручы кешеләр хатынны күреп ала. Алар бу хакта полициягә хәбәр итә.
«Караңгы иде, урамда утлар да юк. Коймага кысылып калган кешене беркем дә күрмәгән шул. Өшегән. Һәлак булган», — дип яза шаһитлар социаль челтәрләрдә.
«Башинформ» агентлыгына әлеге мәгълүматны республика буенча Тикшерү комитетында раслаганнар.
«Чишмә районының Дим авылында хатын-кыз мәете табылганнан соң, Россия Тикшерү комитетының Башкортстан буенча Тикшерү идарәсе тикшерү оештырды. Фаҗига урынын карадылар, судмедэкспертиза билгеләнде, шаһитларны сораштыралар. Якынча белешмә буенча, криминал билгеләре ачыкланмады», — дип аңлатканнар ведомствоның матбугат хезмәтендә.