Башкортстанда яшәүчеләр сукбай песиләр һөҗүм итүдән зарлана
Куркуга калган кешеләр коткаручыларга мөрәҗәгать иткән.
Башкортстанның Белорет шәһәрендәге йорт подъездында бер песи кешеләргә ташланган. Биредә яшәүчеләр 9 апрельдә коткаручыларга мөрәҗәгать итә. Алар подъездга килеп кергән песинең бик агрессив булуын, кешеләрне тырнавын һәм тешләвен сөйли. Бу турыда «Башкортстан» телеканалы хәбәр итте.
«Бу песинең беренче тапкыр гына керүе түгел инде. Моңа кадәр без аны үзебез куып чыгара идек. Бу юлы исә ул баскыч астына кереп посты, ысылдый, кешеләргә ташлана», — дип сөйли бу йортта яшәүче хатын.
Коткаручылар песине тота һәм капчыкка салып куя. Аны сукбай хайваннар өчен приютка илтеп тапшыралар. Биредә аны ветеринар караячак. Песинең тырнакларыннан зыян күрүчеләр турында хәбәр ителми.
Башкортстан Республикасының Гадәттән тыш хәлләр буенча дәүләт комитетында хәбәр иткәнчә, бу соңгы айда икенче очрак булган инде. 3 апрельдә Уфада шәхси йортта яшәүчеләр янына сукбай песи йөгереп кергән һәм кешеләргә һөҗүм итә башлаган. Куркуга калган хуҗалар коткаручыларга мөрәҗәгать иткән.
Сукбай песиләр ашарга яки эчәргә эзләп йөридер. Аларга якын килү куркыныч. Хайван кеше үзенә һөҗүм итә дип уйларга һәм үзе ташланырга мөмкин, дип кисәтәләр ведомствода.