Башкортстанда яшәүче ир-ат тирән чокырда бата башлаган этен коткарган, үзе үлә язган
Тирән чокырның стеналары бетоннан ясалган, аннан кеше үзе чыга алмый, су да бик салкын булган.
Башкорстанның Күмертау шәһәрендә бер ир-ат сулы чокырда батып үлә язган. Ул дүрт аяклы дусты — эткә ярдәм итмәкче булган. Бу турыда «Башинформ» хәбәр итте.
Башкорстанның Гадәттән тыш хәлләр буенча дәүләт комитетында әлеге вакыйга турында сөйләгәннәр. Ир-ат эте белән урамга йөрергә чыга. Шул чакта эт сулы чокырга төшеп китә һәм бата башлый. Бу чокыр су чистарта торган иске корылмалар урынында була. Хуҗасы артык озак уйлап тормыйча, эте артыннан шушы чокырга сикерә һәм ул этне өскә этеп чыгара, ләкин үзе чыга алмый.
Бәхеткә, якында гына таныш ир-ат та була, ул батучы кешегә бау бирә. Чокырдагы ир-ат шушы бауга ябышып, су өстендә торып тора. Таныш ир-ат тиз генә 112 номерына шалтыратып, ярдәм чакыра. Коткаручылар ярдәме белән генә эт хуҗасын судан алып чыгалар.
«Үзе генә булса, батып үлә иде. Бетон стеналы чокыр бик тирән, су салкын, кеше аннан үзе чыга алмас иде. Бар да узды. Бар да исән», — дигән коткаручылар.
