Башкортстанда вәхшиләрчә үтерелгән ир-атның ике баласы ятим калган
5,5 яшьлек һәм 8 айлык ике сабыйның атасын хезмәттәшләре үтергән дип фаразлыйлар.
Башкортстанның Иглин авылында 14 февральгә каршы төндә 35 яшьлек ир-атны үтергәннәр. Николай исемле бу кеше әле шушы көннәрдә генә туган көнен бәйрәм иткән булган. Җинаять арендаланган фатирда булган. Ир-атны башта бик каты кыйнаганнар, аннары сигез тапкыр пычак кадаганнар, шул исәптән муен тирәсен дә яралаганнар. Бу турыда «Башинформ» хәбәр итте.
«Бөтен җаным әрни, бу вакыйга турында бөтен кеше белсен. Якынча белешмә буенча, җинаятьне Николайның элеккеге ике хезмәттәше кылган. алар җиһаз ясый торган фирмада эшләгән. Үтерүчеләрне кайнар эздән Черниковкада тотканнар. Алар шәһәрдән китәргә маташкан. Хәзер бу кешеләр СИЗОда», — дип язган мәрхүмнең иптәше.
Николайның 5,5 яшьлек һәм 8 айлык ике сабые ятим калган.
Туганнары, дуслары, танышлары социаль челтәрләрдә Николайны сагынып яза. «Ике балаңны фәрештәсе булырсың инде», «Син шәп туган идең, яхшы ул, яхшы әти, яхшы ир булдың», «Авыр туфрагың җиңел булсын», «Ышанып булмый», диләр.
«Башинформ» агентлыгы әлеге җинаять турында белешмә сорап Тикшерү комитетына мөрәҗәгать иткән. «Әлеге факт буенча җинаять эше ачылды, тикшерү бара», — дигәннәр Россия Тикшерү комитетының Башкортстан буенча Тикшерү идарәсенең матбугат хезмәтендә.