Башкортстанда поши машинага һөҗүм иткән — видео
Машина йөртүче кыргый җәнлекне куып барып ярсыткан.
Башкортстанның Зилаер районында юлда бара торган машинага поши һөҗүм иткән. Җәнлекне машина йөртүче үзе ярсыткан. Бу турыда «Башкортстан» ДТРК хәбәр итте.
Әлеге видео социаль челтәрләрдә таралган.
Видеорегистратор кадраларыннан күренгәнчә, машина юлдан бара, алдан поши йөгерә. Шулай бераз куып баргач, поши тизлеген киметә. Ләкин машина йөртүче туктарга җыенмый. Шуннан соң поши артка борыла да машинага һөҗүм итә.
Социаль челтәр кулланучылар барысы да диярлек машина йөртүче ир-атны гаепли. Ул вакытында туктаган булса, җәнлек тыныч кына урманга кереп киткән булыр иде, диләр.