Башкортстанда күрше авылга кибеткә барганда авариядә дүрт бала имгәнгән
Машина йөртү таныклыгы булмаган 25 яшьлек ир-ат хатынын, үзләренең ике баласын һәм туганнарының ике баласын утыртып чыгып киткән булган.
Башкортстанның Федоров районында Михайловка-Бала Чытырман юлында җиңел машина авариягә очрый. Биредә алты кеше, шул исәптән дүрт бала имгәнә. Бу турыда ЮХИДИ белешмәсенә сылтама белән «Башинформ» хәбәр итте.
Юл һәлакәте 5 июньдә кичке сигезенчеләр тирәсендә була. Салават шәһәрендә яшәүче 25 яшьлек ир-ат ВАЗ-2115 машинасы белән идарә итә. Салонда аның 25 яшьлек хатыны, 4, 9, 11 һәм 1 яшьлек дүрт бала була.
Йөртүче идарәсен югалта һәм юл кырыена төшеп китә. Аннары машина әйләнеп каплана. Балалар да, хатын-кыз да имгәнә, аларны хастаханәгә озатканнар. Өч бала реанимациядә ята, аларның башы имгәнгән.
Ир белән хатын үзләренең ике баласын һәм туганнарының ике баласын алып, күрше авылга кибеткә барырга чыккан булган. Руль артындагы ир-атның машина йөртү таныклыгы булмаган.
Авариядән соң тикшерү башланган, диелә хәбәрдә.
Имгәнгән балаларның өчесен санавиация белән Уфа хастаханәсенә китергәннәр. Алар авыр хәлдә, тагын бер бала һәм хатын-кызның хәле уртача авырлыкта. Бу турыда Россия Сәламәтлек саклау министрлыгына сылтама белән РИА Новости язды.
Сәламәтлек саклау министры Михаил Мурашко аларга ярдәм итүне үз контроленә алган.
Прокуратура тикшерү башлаган.