Башкортстанда чыршы тирәли әйлән-бәйлән уйнауны тыйганнар
Фойеларда урнаштырылган чыршыны бары тик фотозона буларак кына кулланырга рөхсәт иткәннәр.
2020 елдагы эпидемиологик ситуация аркасында балаларның Яңа ел бәйрәмнәрендә чыршы тирәли әйлән-бәйлән уйнауларын тыйганнар, дип хәбәр итәләр Дүртөйле районының «Юлдаш» газетасында (22-нче сан). Әлеге тыюлар турында республика хөкүмәтендә узган оператив киңәшмәдә мәдәният министры Әминә Шәфикова хәбәр иткән.
Башкортстанда Яңа ел бәйрәмнәре чорында мәдәният учреждениеләрендә күптөрле чаралар планлаштырылган, аларның бер өлеше онлайн форматта гына узса, бер өлеше урамда үткәреләчәк. Бина эчендә узган чараларда залның 30 %ы гына тулы булырга тиеш.
Үзгәрешләр шулай ук балаларның Яңа ел бәйрәмнәренә дә кагылган. Чыршы тирәли әйлән-бәйлән уйнауны тыйганнар. Фойеларда урнаштырылган чыршыны бары тик фотозона буларак кына кулланырга рөхсәт иткәннәр.