Башкортстанда биш яшьлек бала бүрәнә астында калып үлгән
Балалар авыл читендәге бушлыкта агач бура эчендә уйнап йөргәндә фаҗига килеп чыга.
Башкортстанның Ишембай шәһәрендә яшәүче биш яшьлек бала һәлак булган. Бу турыда «Башинформ» үз чыганакларына сылтама белән хәбәр итте.
Бәхетсезлек очрагы 13 июльдә Искесяк авылында була. Балалар авыл читендәге бушлыкта агач бура эчендә уйнап йөри.
«Якынча белешмә буенча, балалар бурага менгән. Бер мизгелдә өстәге бүрәнә төшеп китә. Биш яшьлек малай нәкъ шул чакта аста була, ул бүрәнә астында кала. Башка балалар олыларны ярдәм чакырырга йөгерә. Ләкин соң була», — дип сөйләгән агентлык чыганагы.
Биш яшьлек малай урында һәлак булган, диелә бу хәбәрдә.