Башкортстанда билгесез кеше авыру балага дару алу өчен 90 миллион сум акча күчергән
Әмирә Мостафина өчен таләп ителгән 95 миллион сум акча Яңа ел алдыннан тулысынча җыелып беткән.
Башкортстанда Яңа ел бәйрәмнәре алдыннан билгесез бер хәйрияче авыру балага дарулар өчен 90 миллион сум акча күчергән. Бу турыда «Башинформ» хәбәр итте.
Арка-мускул атрофиясе (спинально-мышечная атрофия) авыруыннан интегүче Әмирә Мостафина өчен кирәк булган 95 миллион сум шулай итеп җыелып беткән.
Акчаны биш ай чамасы җыйганнар. Дару ике миллион доллар чамасы тора. Хәзер Мостафиннар гаиләсе балага дару алу өчен 12 гыйнварда Германиягә китә.
Мостафиннар хәйрияченең исемен атамый, диелә бу хәбәрдә.
ВКонтакте челтәрендә Әмирә Мостафинага акча җыю турындагы төркемдә сөенеч уртаклашалар. Рәхмәт белдерәләр.
