Башкортстанда бер ир-ат үсмер кызны урлап алып китеп, өч ай каеш белән кыйнап торган
Җинаятьтә гаепләнүче ир-ат үсмер кызны машинасына утырып кырга алып китә һәм кабат кыйнап ташлый. Аннары кызны кырда ялгызын гына калдыра.
Башкортстанның Дуван районында яшәүче 28 яшьлек ир-атны «балигъ булмаган баланы урлау» һәм «җәзалау» маддәләре буенча хөкем итәләр. Ул 17 яшьлек кызны урлап, өч ай буе интектереп торган. Бу турыда «Башинформ» хәбәр итте.
Республика прокуратурасы белешмәсе буенча, 2020 елның сентябреннән ноябренә кадәр, көнләшү сәбәпле бу ир-ат 17 яшьлек кызны металл прәшкәле каеш белән кыйный. Бу вакытта ул үзе исерек була. Өч ай эчендә бу хәл берничә тапкыр кабатлана.
Гаепләнүче ир-ат 2020 елның ноябрендә кызны башка ир-ат белән урамда очрата. Шуннан соң ул кызга машинасына утырырга һәм аның белән барырга куша.
«Кыз баш тарта. Ир-ат аның башына суга, машинаның арткы утыргычына сөйрәп кертеп сала. Кызны Тастүбә авылыннан 19 км ераклыкка кырга алып китә. Ир-ат кызны кыйный һәм кырда ялгызын калдырып китеп бара», диелә ведомство хәбәрендә.
28 яшьлек ир-ат гаебен таный. Якын арада суд булачак, диелә хәбәрдә.