Башкортстанда бер хатын кошчылык фабрикасында бала тудырган һәм чүплеккә ыргыткан
Нарасый гәүдәсен чүп эшкәртү комплексында тапканнар.
27 гыйнварда Башкортстанның Мәләвез шәһәрендәге чүп эшкәртә торган комплекста яңа туган сабый гәүдәсе табыла. Соңрак тикшерүчеләр баланың анасын да таба. Бу турыда «Башинформ» хәбәр итте.
Агентлыкның үз чыганагы белешмәсе буенча, баланың анасы — 26 яшьлек хатын, аның ире юк, тагын балалары бар. Хатын чираттагы йөклелеген яшереп йөргән. Аннары сабыйны эш урынында — кошчылык фабрикасында тудырган, бу вакытта бинада кешеләр булмаган. Шулай итеп ул бала табуын яшергән. Ир бала үле туган дигән белешмә дә бар. Хәзер аның үлеме сәбәпләрен экспертлар ачыклый.
«Хатын баланы полиэтилен пакетка тыгып куя һәм биредә үк — кошчылык фабрикасында — чүп контейнерына ыргыта. Аннары чүп ташый торган машина килә, мичкәне бушата һәм алып китә. Бала гәүдәсе чүп эшкәртү комплексында табыла», — дип сөйләгән агентлык чыганагы.
