Башкортстанда авариягә очраган машинада ундүрт яшьлек кыз мәете табылган
18 яшьлек йөртүче автомобильне ташлап качып киткән.
13 апрельдә Башкортстанның Кушнаренко районында иртәнге алты тирәсендә юл һәлакәте була. Шәрип-Первушин юлының унынчы чакрымында авариядә 14 яшьлек кыз бала үлә. Бу турыда «Башинформ» хәбәр итте.
ЮХИДИның якынча мәгълүматлары буенча, ВАЗ-2106 машинасы юлдан чыгып китә һәм каплана. Шуннан соң машина йөртүче транспортны ташлап, авария урыныннан качып китә. Авария урынында 14 яшьлек кыз бала мәете табыла.
Машина йөртүчене полиция эзли башлый. Соңрак аның шәхесе ачыклана. Ул 18 яшьлек егет булып чыга. Тикшерү вакытында ул өендә, аңсыз хәлдә ята. Аның тәнендә имгәнгән урыннар була. Бу травмалар авария вакытында барлыкка килгән дип фаразлана. Егетне хастаханәгә озатканнар. Бу турыда Башкортстан буенча ЮХИДИ хәбәр итте.
Бу егетнең машина йөртү өчен таныклыгы булмавы ачыклана. Хәзер тикшерү эшләре бара.
