Башкортстанның Салават районындагы Урмантау авылында яшәүче алты яшьлек Ранель Ганиев 5 июньдә югалган. Бу турыда «Башинформ» хәбәр итте.
Бала өйдән чыгып китә һәм шуннан әйләнеп кайтмый. Әти-әнисе баланы тапмагач, эзли башлаганнар, аннары полициягә мөрәҗәгать иткәннәр.
«Бала табылмады. Эзләү дәвам итә», — дип сөйләгәннәр «Лиза Алерт Башкортостан» эзләү отрядында.
Малай турында белешмәсе булган һәркемгә 8-800-700-52-54 шалтыратырга сорыйлар.
Ранельнең буе 110 см чамасы, ул чандыр гәүдәле, саргылт чәчле, зәңгәр күзле. Баланың өстендә зәңгәр кофта, караңгы-зәңгәр шорты, аягында ачык төсле сандали булган.
Ранель Ганиев югалганнан соң, «нәни баланы үтерү» маддәсе буенча җинаять эше ачылган. «Бала моңа кадәр дә югалган булган. Ул чакта аны әти-әнисе эзләп тапкан һәм өйгә алып кайткан», дип хәбәр итте Россия Тикшерү комитетының Башкортстан буенча Тикшерү идарәсенең матбугат хезмәте.