Башкортстанда 20 ел гинекологка күренмәгән хатынның эчендә биш килолы шеш үскән
Шеш гигант үлчәмгә җитеп, эчке органнарын кысырыклый башлагач, ул хастаханәгә килгән.
Башкорт дәүләт медицина университетының Уфадагы клиникасында 49 яшьлек хатын-кызга операция ясаганнар. Аның аналыгыннан 5 кило авырлыктагы шешне алганнар. Бу турыда «Башинформ» хәбәр итте.
Акушерлык һәм гинекология кафедрасы җитәкчесе, профессор Әлфия Ящук сүзләренчә, бу хатын 20 ел буена гинеколог-табибка күренмәгән.
«Бу атипик миома, ул гомуми венага берегеп катлауланган. Пациент 20 ел буенча гинекологка күренмәгән. Шеш гигант үлчәмгә җиткәч, эчке органнарны кысырыклый башлагач кына безгә килгән», — ди профессор.
Операция ике сәгать дәвам иткән һәм уңышлы узган. Тиздән бу хатынны өенә кайтарып җибәрәчәкләр, диелә хәбәрдә.
